متلازمة البطل

كاينين ناس فهاد العالم الصغير مصابيين بواحد الحالة كاتسمى متلازمة البطل ، هاد الناس كايتصحاب ليهم راسهم هوما لي غادي ينقدو البشرية ، كايبغيو يعاونوا كولشي لي داير بيهم بشكل مفرط على حساب وقتهم و خدمتهم و سعادتهم و وااخا ديك الحاجة مايقدوش عليها لمهم هو يخشييو نيفهم صححا ، ويقدر تكون نتا فخطر و يجري صديقنا باش ينقذك واخا ماكاتجيه والووو و واخا غادي يعرض راسو للخطر بشرط انه يبان بطل فهاد المشهد ، و سطرو مزيان على هاد الجملة الاخيرة حيت ماشي عيب تعاون الناس ولكن المشكل هوااا ديك الرغبة ديالك الجامحة باش تبان واعر ، الابطال ديالنا ايلا وصلو لحالة خطيرة كايقدرو انهم يفتاعلوو مشاكل باش يحلوها للناس و فالتاالي يبانو ابطااال ، وفعلا طراو بعض الحالات بحال هكا ، كانو لقاو ف امريكا بلي شي اطفائيين هوما لي كايشعلو الحريق ف الغابة و كايمشيو يطفيوها باش يجيو الناس و يصفقو عليهم و للعمل البطوولي ديالهم ، و يقدر مثلا يجي بوليسي يفتااعل شي سيناريو مع شي شفار باش يجي هو و ينقد فتاة مثلا كانت كاتعرض للسرقة و قس على ذلك الكثير من الامثلة و لكن ماشي ب الضرورة المصابين بهاد المتلازمة يديرو هادشي كاامل ، حيت غي ايلا الشخص خدام موظف مثلا و كايقهر راسو بالخدمة و يعاون هادا وداك بشكل مفرط و كايتسنا من هادشي يجيو الناس و يشكروه و يقولو فلان الله يعمرها دار ، ف هادي بحد ذاتها علامات ديال متلازمة السوبر هيرو ، و الاشكال هو هاد الناس كايعيشو فواحد المثلث ف مثلا ايلا شي مرإة ( بطلة ) كاتهلا فراجلهااا و كاتحطو فوق الراس بغية انه يعتارف ب المجهودات ديالهااا و فالاخر ماعتارفش بيها ، هنا كاتحول من حالة بطلة الى حالة الضحية و ايلا تطورات القضية تقدر تحقد عليه و تدوز من الضحية ل حالة المنتقم و تما غادي تحاول ترجع ليه الصرف و كاتبقا عايشة فواحد دواااامة.
المساعدة ضروورية لاننا انسان و خاص نعاونو الانسان ولكن ايلا قدينا عليها ، اما شي حاجة لي ماتقدش عليهااا ف لا حرج عليك يا صديقي .
#خربشات_مريم_بنعلي