راس الدرب " الجزء 4"

ملي وصلني الاب د سكينة لدارنا و كيف وصلنا للحي  و هو يقولي

-الاب ",شنو سميت هاد المنطقة فاش ساكنا ا بنتي "

- انا" هاد الحي سميتو ليراك و حتا هوا تابع للانزكان "

شوياا و هواا يبان ليا كايقلب ف عيينيه و كايتعرق و حسيت بلي شي حاجة ماشي طبيعية واقعااا و هو يقولي

-الاب " مممممم ليراك اه كانسمع بيه و كيف داير الوضعية عندكم ف الحي ياكما عممر تعرض ليكم شي حد هنا  لا قدر الله مع الدنيا عندكم خاويا"

-انا " لا لا اعمي انا شخصياا ماعمر تعرض ليا شي حد ولا شفت شي حد ماهواش "

و ملي جاوبتوو بهاد الجواب حسييت بيه رتاح  جزئيا ونقص من حدة التوتر ,حيت  انا من الاشخاص لي كانقدر نلاحظ أي علامة على وجه المخاطب لي كاندوي معاه و بحال هاد ستوناات مايدوزهومش عليا شي حد و المهم هو يودعني و مشاا ب سرعة .

وصلت للدار طلعت ل بيتي و تكيت ليا معا راسي و بقيت كانفكااار ف هاد الروينة لي دخلات ليا ل حياتي . كنت بيخير هانية و مهنية , اش داني ندوز من ديك الطريق  , كون دزت من الطريق الاخرى كاع ماغادي نتلاقاا ب خوتناا فالله المشرملين ,كون و كون و كون و لكن لي طرا راه طرا و بما انني دخلت اللعبة خاص نبقا فيها حتا الاخر , و المهم قلت نرتاح شوياا , سديت عليا البيت و نعست تقريبا ساعتين و ملي فقت  قلت نضرب طليلة على الفايسبوك و نهضر مع سكينة ماربما نطلع منها شي معلومة , و انا نتفااجئ بلي الفايسبوك د سكينة مابقاش كايطلع ليا .. كيفاش زعما تكون بللوكاتني .. لا مايمكنش يقدر مديزاكتيفياه .. ولكن علاش غادي تسدوو .؟؟ شويا و انا نعيط ل نمراا ديالها و كايقولو لي بلي ' هاتف مخاطبكم  غير مشغل ' و حتا من نمرتها مابقاتش كاطلع ف الواتساب.. و أي وسيلة باش غادي نهضر معاها راه تسدات ف وجهي , بقا ليا حل واحد هو نحل عينيا مزيان ف لافاك , المشكل لي درت هو انني ماسولتهاش اشمن كروب فاش كاتقرا بالضبط باش نعرف استعمال الزمن ديالها و بحكم ماشي مدة طويلة باش عرفتها ماقدرتش نجبد بحال هاد الضواسا..

دازو الايام سكينة مابقاتش كاتبان ليا نهائيا ف الكلية , كايقول ليا واحد الرااس نمشي عندهم للدار و لكن لا .. قلبي مامطمأنيش و نقدر نتعرض للخطر .. ايوا واحد النهار دخلت ل الفايسبوك ب وااحد الحساب ديالي قديم و قلت نقلب على الفايس د سكينة و فعلا كيفما توقعت خرج ليا الفايس ديالها و فالتالي هي ماسداتش الحساب ديالها و انا بلوكاتني انا شخصيا , علاش بلوكاتني و بلا ماتقول ليا والو , والغريب ف الامر بلوكاتني مباشرة بعدما مشيت معاها لدارهم و تعرفت على ل الاهل ديالها .. بزاف د الشكوك كايدوورو ليا ف الراس و لقيت واحد الحيلة جهنمية باش غادي نقدر نجبد ضواسا ديال عائللة سكينة . واخا صراحة غادي يكون تصرف لا أخلاقي مني ولكن ماعندي ماندير هوما لي بداو ..

الغذ ليه تاصلت بواحد ساط كانعرفو سميتو يونس كايقرا ف كلية الاقتصاد . دري زوين و معروف فالكلية كاع الدريات كايتجمعو عليه و بالاخص حيت عندو حديدة فاعلة تاركا  و القراية الله يجيب و حيت باه صاحب شركة معروفة يعني كاين علامن يعول ..المهم سي يونس جاوبني و طلبت منو باش نتلااقااو حيت عندي مانقوليه . و طبعا يونس مايمكنش يرفض طلب بحال هاد الطلب من شي بنت , و اصلا هاديك هيا حرفتوو ف الحياة و نقطة الضعف ديالو ..مازال كانعقل بلي شاف معايا واحد البنت واحد المرة و عيا مايطلبني باش نعطيه نمرتهاا و لكن قمعتووو و خصوصا ديك البنت ماعندها لا فايس لا والو و ماكاتقراش ف لافاك . تقطع مسكين وعلى مابان ليا طيحاتوو  و دابا جات الفرصة لي من  خلالها يقدر ياخد النمرا ولكن بواحد الشرط . و المهم تلاقيت مع يونس ف واحد الكافي و من مورا ديك الهضرا د كيدايرا لاباس كاين شي جديد و انا ندخل ف الموضوع مباشرة و قلت ليه

-انا " يونس كنتي طلبتيني على واحد النمرا ايوا اليوم حن قلبي عليك و غادي نعطيها ليك "

-يونس' واااايلي ماعمرني نسا ليك هاد الستون أ مريم يالاه ارا برع دوزي ليا الرقم "

-انا '' غير بلاتي ماشي غير اجي و نعطيك النمرا . قولي بعداا شنو مومكين تدير باش نعطيها ليك "

-يونس '' سمعي ا مريم و الله حتا ديك البنت حاس بلي عندي معاها شي مستقبل و نقدر ندير أي حاجة على قبلها "

صراحة انا جاني الجواب ديالو بحال داكشي د المسلسلات حيت كون كنت انا ف بلاصتوو غادي نقول بالناقص من شي نمرا لي غادي نتمرت ب سبابها .. ولكن مزيان هاد ديفو لي فيه غادي يخدم لصالحي و انا نرد عليه "

-انا " شوف غادي نعاود ليك واحد القصة و اقسم بالله ايلا خرجتيها ماغادي يعجبك حال , و بدل مانسهل ليك الطريق مع الاميرة د الاحلام ديالك غادي نخلي عشتك خصوصا و عندي عليك بزاف د ضواسا و نقدر نخرجهم ف أي لحظة ..بحال ضوسي د ايمان "

خونا تضهشر ملي ذكرت ليه ايمان هادي قصة بوحدها و ايمان صاحبتي و هوا ماكانش عارف و طرا بيناتهم  واحد ستون .. صراحة ماشي من طبيعتي نهدد الناس و اصلا انا ماغاديش نفرشوو غير قلتها بلعاني باش نخلعو و  هادشي لي كاندير فيه عرفتوو بلي لا يجوز ولكن ماعندي ماندير

-يونس " واخا الالة الااااا ايمان ..  ايلا عرفني الواليد اش درت غايحرمني من الورث ..صافي غير طلبي شنو خاصني ندير  و شنو هيا القصة "

و انا نعاود ليه القصة كاملا ديال راس الدرب حتال حد البلاصة فين بلوكاتني سكينة

-يونس " واش كاتدوي من نيتك أ مريم .. لا لا أثر فيك داك الفيزيك لي كاتقراي و تسوطا ليك شي كابل ف الدماغ "
-انا " نتا لمن غادي يتسووطا ايلا ماعاونتينيش "

-يونس " باش غادي نقدر نعاونك "

-انا  "  سمع انا بغيتك تقررب من سكينة , تولي من صحابها المقربيين . راني عارفك عندك مع تعناااب بروفيسيونيل و نتا تبارك الله عندك كاع المقومات بالعربية تاعرابت خاصك طيحها "

-يونس " ماطلبتي غير الموجود ولكن باش غادي ينفعك هادشي  "

-انا " راه خاصني نعرف شي ضواسا عليها و بغيتك تدخلها ف الفايسبوك  وتبدا عليها بداك الزعت البلدي لي مولف مع الدريات و لكن بالعقل حيت سكينة بنت ذكية بزاف و تقدر تورقك و اول حاجة غادي تدير مسحني انا من الفايسبوك باش ملي تدخلها ماتبانش ريحتي ف القضية . وماكاتعرفني ماكانعرفك وقبل ماتدخلهاا ل الفايس بقاا لوح هاد اليامات منشورات علمية .انا غانبقا نصيفط ليك و نتا لوح باش تبان عليك عزيز عليك العلم حيت سكينة من الناس لي كايديو على العمورية ديال العقل اولا ثم الكمارة ثم الجيب ..و من بعد شي اسبوع د المنشورات العلمية عاد دخلها  باش هيا ملي تشوف طلب الصداقة ديالك غادي تضرب اطلالة ف الحائط ديالك و غادي تعجبها و خلاص غادي تلقاك بوكوص و عندو الفلوس اكيد غادي تقبلك ."

-يونس " صافي مفهوم انا غادي نطبق هادشي لي قلتي بالحرف و نتواصلوو ف الواتساب "

دازت مدة د اسبوع و يونس دار داكشي لي قلت ليه و طبق السياسة لي تافقنا عليهااا و المير ديالوو ولا منور ب العلم تقول اينشتاين د لمغرب .. ايوا جا اليوم لي كنا كانتسناوه . صافط طلب الصداقة  ل سكينة و من موراا  خمس ساعات قبلات الطلب ..كيفما توقعت الخطة ديالي خدمات , المهم يونس صافط ليها ميساج و داكشي  بلفرونصي و اللباقة و اللطافة , السيدة تجاوبات معاه .. حيت هيا شبه مخصوصة عاطفيا و لكن رادا البال مزيااان و قاليا يونس بلي ماكانش ساهل عليه يطيحها من نهار الاول و لكن بعد عدة محاولات و انا استغليت واحد النقطة هيا انني عارفا دياسك لي كايعجبوها و الافلام الخ وكانقولهم ل يونس باش يصيفط ليها شي حاجة من الذوق ديالهااا باش تفرح و فعلا سكينة بدات كاتحس معاه بالراحة وقالت ليه بلي ماعمر تلاقات بشي ولد لي فهمها قد يونس ههه ايه اودا يونس وليتي بطل مغوار في نظر سكينة و لكن هادشي غير الجزء الاول من الخطة و فالتالي كان خاصنا نتقدموو خطوات اخرى للامام .يونس طلب من سكينة باش يتلاقاو و هيا كان عندها تحفظ ف الاول و لكن قبلات و فعلا تلاقاو وو جلسو ماشي مرة ماشي زوج ...و سكينة كثرات على يونس الاسئلة و اول سؤال سولاتو هوا فين ساكن و طبعا عطاها العنوان .. قلت ف الاول يمكن غير بغات تعرف المستوى المعيشي ديالو ولكن من بعد غادي نكتاشف بلي كاين سبب اخر ..

يونس  بدورو بدا كايسولهاا على بعض الامور لي كنت محتاجة نعرفهم باش نتقربو منها اكثر و واحد الوقت سولها شنو باغا تكون ملي تخدم و جاوباتو بلي باغا تولي بحال باباها  ذكتورة ..و حيت يونس مكلخ قالها دكتورة ديالاش العينين ولا الودنين . و هيا تجابوو بلي باباها عندو زوج دكتورات و حدا ف البويلوجيا و وحدا ف الكيمياء ...دابا عاد فهمت لاش السيدة كاتطيير ف الكيمياء . قول ليا باها ذكتور ف ضومين . اللغز غادي و كايتحل و فنفس الوقت كايتعقد .. بزاف د المعطيات قدامناا ..لمشرمل لي كايفهم ف شيمي  عندو علاقة ب الاخ ديال سكينة لي   ب طوموبيلتوو مشاو ديك المرة . الاخ الاخر د سكينة لي تلاقينا معاه قدام باب دارهم عندوو مختبر للتحليلات معروف  ف اكادير و كيفما كانعرفو ضومين د التحليلات عندو علاقة وطيدة ب الكيمياء و البيولوجيا و الطب الخ ..الاب د سكينة لي حتا هو عندو دكتوراه ف نفس الحاجة . يعني مابقاش شك بلي القضية فيها ان و دوك العائلة مخبيين شي سر كبير و غادي نعرفو ب المساعدة ديال يونس .

واحد النهار سكينة بغات تعرف يونس على عائلتها مع راكوم عارفين الناس هاي كلاص ماعندهمش مشكل وهوما اصلا غير اصدقاء واخا باين بلي سكينة طاحت طيحة خايبة و طبعا يونس مارفضش الفكرة و مشاا معاها للدار . دخلو و  جلسوو ف الصالة و مابان ليه حد ف الدار .شوياا  الاب د سكينة بدا كايعيط ليهااا و هيا تنوض و حيت يونس صنطيحة و ماكايخافش ناض تبعها ب الخف و طلق وذنيه باش يسمع اش كايقول ليها باهاا و دار الحوار التاللي بيناتهم

-الاب " بنتي شكون هاد المخلوق لي جبدتي عاوتاني للدار . راه وليتي كاتجبدي ليناا المشاكيل "

-سكينة " لا لا ا بابا هاد المرة كون هاني راني بحثث عليه مزيان و ماعندو باش يضرك "

-الاب " سولي شي حد ف خوتك على الخارطة  الجغرافية فاش  كاينشطو الاعمال ديالنا لايطرا نفس الموشكيل ديال ديك صاحبتك لي فيها الهضرا بزاف "

-سكينة " انا بسباكم خسرت اعز صديقة عندي ولكن ماعندي ماندير الوالدين و العائلة ديالي اولا ,, وراه سولت خويا  الياس على المناطق د الخدما ديالكم و يونس بعيد كل البعد على دوك البلايص الفلانيين "

شويا هيا ترجع سكينة و يونس تسلل و رجع دغيا للصالة و دار راسوو بحال ايلا ماسمع شاي و بداو كايهضروو و شويا هوا يقول لها بلي خرج عندو شسي طارئ و خاصو يمشي فحالو و فدوك الاثناء انا كنت كانسناه ف دوك االنواحي ديال الحي فاش ساكنا سكينة باش يعطيني التفاصيل و عاود ليا كولشي و عاد فهمت السبب لي خلاها تبلوكيني  و فهمت علاش الواليد ديالها ملي وصلني و عرف بلي سميت الحي فاش ساكنا ليراك انزكان هو يتبدلو فيه الالوان .. و فهمت علاش سولات يونس على الحي لي ساكن فيه ولكن لي مامفهومش  أشمن خارطة جغرافية د العمل و شنو طبيعة خدمتهم و لاش خايفيين حتاال هاد الدرجة و رادين البال من الصغيرة و الكبيرة هادشي لي غادي يعاودي لينا يونس ف الاجزاء القادمة 

بتبع