الانتخابات

موضوع الساعة كيما كانعرفوو جميع هو الانتخابات , و هاد الفوضى لي نايضا ف الفايسبوك هي أمر ايجابي صراحة حيت كاتخلق واحد الجو د الصراع و حتا النقاش و كولشي كايتفررش قدامك و  حيت نتا فداارك و مع راسك كاتكون حاير واش نصوت اه  ولا لا و علامن غادي  نصوت , لموشكيل هو ايلا كاتسول راسك '' علامن نصوت واش ولد عمي عومار ولا صاحبي موحماد' و  ولا كاتسنا شي حد  يجي يخلص عليك خبزة د نص ريال باش تصوت عليه . تما بالضبط عرف راسك بلي بحالك لي خرجوا على البلاد  و يستحسن تهاجر لشي بلاد اخرى , راه الاخوان لموشكيل ماشي ف البلاد لموشكييل فللي مسيريين الشأن المحلي و هادوك شكون منصبهوم راه نتا سواء كنتي كاتصوت ولا منقطع حيت في كلتا الحالتان  نتا لي كاتأثر , و هنا خاص نكونوا واقعيين و بعاد عن كل العلاقات الانسانية و الاجتماعية و العاطفية , و نسا باك و موك و خوتك و الفاميلا و الصحاب , فكر بمنطقية و قول شكووون غادي يخدم هاد المدينة , شكون غادي يتهلا فينا على دور العام ماشي شكون غادي يدور معانا ب نص ريال ماشي حتا ريال , حيت ايلا وكلك ليوم , شكون غادي يوكلك غدا .؟ اكيد غادي يطلع و ينساك ,و فبعض الجماعات كانشوفو بلي نفس الكمامر ديما موجودين  و ماعمر تبدلات شي حاجة , اذن لاش غادي تصوت ليهم و هوما مانفعوك بل ضروك و ضرو ولادك و بلادك . و قبل ماتحكم على شي مترشحين خصوصا الاوجه المألوفة بحث في الملف ديالهم شوف أش دارو باش منطقتك تزيد لقدام . و حاجة موووهيمىة  فالحملة أكيد كايقولو ليكم غغانديرووو كدا و غاندخلو ليكم الضو و الماء , اولا واش كاضحكو علينا واش حنا ف الموزمبيق راه الضو و الماء هادوك ماتهضرش عليهم راح حاجة خاص تكون راه المغرب هادا , و ايلا شي مترشح  قديم و طالع شحال من مرة قبل قووليه ماك مادخلتيهوم سينين هادي, للاسف كايتفلاو على الشعب . ايلا غادي تصوت شوف البرنامج لي بناء و كايهتم بكولشي من الاساسيات حتال الكماليات ماشي غي الماء و الضو , و بالنسبة للناس لي منقطعيين من حقهوم حتاهومااا حيتاش تقريبا كولشي ولا فحال فحال و لكن  مانعمموش و يا اخوان ضربوو طليلة تقدروو تلقاو شي حد في ضو ,  و ايلا كولشي في الهوى سوى  راه خاص تنووض ثورة ماشي نقاطع و نسكت , حيت  ايلا نقاطعتي باش غادي تنفعنا و بالعكس خرج ل أرض الواقع و فرض الرأي ديالك و دافع على حقك القانوني المشروع , و في النهاية كل واحد فينا كايتحمل المسِؤولية ديال المترشح لي صوت عليه . باش غدا و لا بعدو ماتجيش تقول لي راه ماعندناش كدا ف حينا و ماوفروش لينا كدا و لمرة وحدا فحياتك عطي  ل راسك قيمة و مايشريوكش ب خبزة , و ماتخلي حتا شي حد يقرر فبلاصتك , خدم ضميرك , و ايلا كانت فيك شويا د تامغريبيت دافع عليها و تحية ل اي واحد  ضميرو مازال خدام و تحية لاي واحد كايبارطاجي لشي حزب حيت عارف بلي فيه ناس خدامين ماشي حيت صاحبو و بئسا للناس لي عارفين بلي شي حد ماكايسوا حتااا غرام و كايبارطاجي لصحابو ف الفايسبوك ولا ف الزنقة يصوتو لشي حزب لا يستحق . عرف بلي هادشي امانة في رقبتك فلا تخن الامانة .