كيفاش تكون عنيبة صالح

الطبيعي هو ان تكون كائن عنيبة ، لان التعناب مسألة جد طبيعية  في الكائن البشري ، ولي ماشي طبيعي هو انك تكون فاقد للاحساس و ماكاتقدرش تعبر على المشاعر ديالك او كاتكبحهم بسبب النظرة الدونية للكائن العنباوي من طرف المجتمع و فالتالي كيفاش تكون عنيبة صالح في المجتمع ؟

- التعناب خاص يكون صادق ، يعني ماتقولش شي حاجا ماشفتيهاش او ماحاسش بيها غي باش تزوق الهضرة باش تسمى جانتل و sympa او كاتضرب تحصل على قالب حلوى مجاني.

- التعناب ماخاصش يكون مبالغ فيه يعني دوي و قيس و الزيادة راه من راس الحمق حيت الطرف الاخر ماشي مكلخ باش يتيق اي حاجا كاتقولها خصوصا البنات بمجرد تبدا تزيد فيخرات كاتعرفك غي طانز عليهااا .

- تعنبتي على شي حد لا يعني انه عجبك او انك كاتقلب على شي حاجا معاه ، تقدر تكون غي مجاملة دايزا حيت كاينين ناس عزيز عليهم يتغزلوو بالجمال من باب حب الجمال فقط .

- خاصك تميز مابين التعناب و التحرش ، مع ان التعناب فرع من فروع التحرش ، ايلا كانت بنت غادا فالشارع و ماكاتعرفهاش و سطر مزيان على ماكاتعرفهاش و بديتي عليها بدوك التعابير التعنابية لي فغالب الاحيان مخالفة للشروط السابق ذكرها ف راه يا اعزيزي و عزيزتي غي كاتحط راسك ف موقف بايخ ، لان هنا دخلتي ف خانة التحرش ، اي كاضيرونجي واحد ماكاتعرفوش ، راه سواءا تجاوب معاك الطرف الاخر او لا راك كاتبقا متحرش ، و باش يتحقق التحرش خاص تكون قلتي ليها شي تعبير تعنابي زنقاوي ، على عكس ايلا وقفتي وقلتي ليها : ( مووومكين دقيقة من وقتك ) جاوباتك اتس اوكي ماجاوباتش قلب 69 ، باش تبقا كائن عنيية زوين ، و فالتالي تعناب لي كانهضرو عليه من الصباح خاص يتستعمل فأوقات مناسبة و مع الاشخاص المناسبين لي خاص بالضرورة تكون كاتعرفهم وماشي غرباء باش ماطيحش فمواقف بايخا .

- قبل ماتعنب على البنت حاول تأكد انها تبادلك نفس المشاعير وماعمرك تعنب على شي وحدا يالاه عارفها ب 5 دقايق ، على الاقل جلس حتا تسخن بلاصتك عاد بدا الخطة الهجومية و هنا كانزيد نأكد وأياك تعنب على شي وحدا ماكاتعرفهاش و على سبيل المثال شي وحدا يالاه اجوتيتيها فالفايس و من مورا ( سلام ، صافا ) ، كاتبع ليهم (عجبتني ، عويناتك زوينين ) ...هادشي غلط في غلط ،حيت نتا ماشي هو دافييد بيكام باش تطيحها من الدقة ..

- التعناب لي مبالغ فيه فالتعاليق فالفايسبوك غالبا كايكون عبارة عن طلعاااات بين الصحاااااب و من باب الضحك و اما لي كايديرها من نيتو و كايبدا يعنب شي وحدا ( ملي شفتك نسيت سميتي ، كلك زبدة وماعرفت منين نبدا ) و دوك التعابير المبتذلة فراك هبيل و خاصك شي طبيي نفسي حيت اي حاجا زادت عن حدها كاتولي ماخداماش ، وحتا ايلا نقصات فراه ماخداماش وفالتالي حاول تحافظ على ليكيليبر .

- تعاون بنت ف تمرين ولا تهز معاها شي حاجا ثقيلة او تقدم لها يد المساعدة لا يعني ابدا انك كاتعنب حيت هادشي مظاهر انسانية و الفتاة كائن جميل لطيف رقيق خاصك تمد ليها يد العون و كون اكيد انها غاترجل معاك ايلا حتاجيتيها ، وحتا ايلا باغي تديرهم باش تلفت انتباه الفتاة و تعجبها راه مافيها حتا عيب ، غي في حالتما كملتو فالعلاقة تبقا تعاونها كيفما الاول باش ماتسماش انك كنتي كاتمثل باش توصل لداكشي لي بغيتي .

-ماعمرك تسوق للمجتمع او بعض الجهات لي كايشوفوك غي درتي جيم لصورة فتااة او حاولتي تعاون فتاة شي حاجا و المشكل احيانا نتا ماكاتكون قاصد والووو من التصرف ديالك و كايبداو يتنواو و يكلاشييوك و يضحكو عليييك و فالتالي ماتديش عليهم و ماتسمعش ليهم و تسنط لقلبك و انسانييتك و حتا ايلا بصاح نويتي تعنب راه حيت نتا انسان و الانسان عندو مشاعر و حتا حد مامصنوع من الفلاذ ، حاول ديما تكون عنيبة ذكي وماتخليش الطبيعة الحيوانية تسيطر عليك حيت هيا لي كاتخرجك من التوازن وكاتولي ( متحرش ، حمار ، كذاب ، منافق ) في نظر الفتاة و ماتخليش ايضا المجتمع يسيطر عليك سلباا حتا تولي ( بدون مشاعر ، معقد ، حاس براسو ، بارد ..)
#خربشات_مريم_بنعلي