ماتزوجش ب نجاة

عزيزي الرجل لي يالاه غادي يخدم من مورا سنوااات ديال العذاب و القرايااا و الكفاح و طوبيس و قلة المادة و تيتيز ، طبعا اول حاحة غادي تدور ليك فالراس هيا تقلب على الاستقرار و لي هو عند كحل الراس : الثلاثي المقدس ( المرأة ، الدار ، طوموبيل ) ، و هنا غادي تكون كاتدير اكبر خطأ فحياتك ، عزييزي بوركابي علاش غادي تمشي تشنق على راسك و تزير راسك بالمسؤولية و نتا الشمتة ديال s1 باقي مادوزتيها ، وكاتجري تزوج بحال ايلا ماعمرك شفتي شي انثى و كاتدخل ف دوامة لا منتهية ، و طبعا حلم الكثيير من الفتياتش المغربية هو العرس لي غاتخسر فيه ا صديقي فلوس صحاح و لي غادي يهضرو فيه الناس بالخايب واخا تجيب ليهم الشاف موحا شخصيا يطيب ليهم و عثمان مولين يغني ليهم ، و من مور العرس غايخصك طبعا فين تسسكن الزوجة المصون ، و هنا غادي تقج راسك بالكريييديات باش تشري دار فالسكن الاقتصادي و من موراها تزيد عليك الكريدي ديال طوموبيل داسيا من الفوق وبلا مانهضرو على المصاريف ديال الدار ، من اكل و ملبس و مشرب و الفلوس د القهاوي و المساريات و و و و ، ولكن الكارثة هيا ملي كاتزيد تصنط للمجتمع و كاتزرب على عمرك و كاتقرر تجيب البخوش لهاد العالم الحقير ، كاتظلم راسك و كاتظلمو معاك و كن على يقين من مور عاميين من الزواج غاتحس براسك تشمتي فالشباب ديالك و غاتولي عايش فحبس مؤبد ، كان بالامكان ديالك تأجلو من الاصل حتا تستعد ليه نفسيا و جيبيا ..وفالتالي ا بب خلي داك صالير يسخن ف جيبك شويا ، حس بحلاوة الدرهم ، خرج و تسارااا المغرب ، شري كاع داكشي لي كنتي محتاج ليه قبل و ماكانش لي يعطيه ليك ، كن على يقين ان تيتيز غادي يطيح عليك من حيث لا تدري ياما حيت اغلب الناس عندهم تفكير مادي و عاد غادي تبان ليهم ياما غاتكون الحالة الخارجية ديالك تحسنات من مور مادورتي الصرف ، شوف غي احمد شوقي و المجرد و الطبقة كيف كانو و كيف ولاو حيت الفلوس كايحلو اي بروبليم ا عزيزي و حتا داك لبروبليم لي على بالك ، و غادي تقولي لا أ مريم ، راه كانبغي نجاة و مانقدش نخليها و غانجاوبك كيما كايقول واحد الصديق ديالي : كانبغيه ماشي بالضرورة كاتعني نتزوح بيه ، على الاقل ماشي بسرعة ، عييش الحياة اولد الناس و نجاة ايلا بقات فدارهم غاتنقص عليك المصاريف و فالتالي غادي تقدر تخرجها ديما و تهلا فيييها ، سافروو ، ضحكوو ،نشطووو حتال النهار لي فعلا كاتحس براسك دوزتيييييي الحياة و كاتكون متأكد بلي نجاة هي the one عاد نوض جيب القوالب د سكااار و دخل للقفص الذهبي و نتااااا مرفوع الراس ، و تما غادي تولي تضرب على couple goals جداد ، غادي تخرجو tripiw مثلا ، مرة فشي جبل مرة فشي واد ، غادي تستكشفو بزاف د العوالم جداد و غالبا غادي تكونو ناااضجيين و مستعديين لحمل اي مسؤولية و حتا عقلكم غايكون كبر ز ماغاتلقاوش مشكل كبير فالتفاهم حيت مادام بقيتو مجموعيين لمدة طويلة الا و غادي تكون كاتجمعكم رابطة قوية ...و تحية لاي بنت سميتها نجاة 😂

#خربشات_مريم_بنعلي