حوار مع مثلية مغربية

في هذا الموضوع سأتطرق لمسألة المثلية الجنسية بالمغرب و الحوار سيكون مع فتاة  تبلغ من العمر 20 سنة , و لكي نتقرب أكثر من حياة مثلية مغربية أترككم مع هذا الحوار و الذي يمثل وجهة نظر الفتاة لطيفة بعيدا عن رأي الكاتب .

-لطيفة متى اكتشفت ان لك ميولا غريبا عن ميول الانسان العادي و واش تقبلتي الفكرة ولا لا.؟

منذ عامين تقريبا بدأت أبحث حول موضوع المثلية الجنسية التي لم أكن أعيرها أي إهتمام , وإكتشفت أن ميولي ليس مغاير , و أتذكر جيدا كيف كنت أنجذب للبعض من صديقاتي في عمر صغير جدا تقريبا منذ 8 سنوات , لكن لم أكتشف ولم أعرف حقيقة هادا الميول حتى 16 من عمري , وطبعا لم أتقبل الفكرة في البداية و حاولت إقناع نفسي بالعكس ومع مرور بعض الوقت بدأت أتقبل نفسي و الآن أنا متصالحة تماما مع نفسي و مع ميولي .

-واش واليديك و الاصدقاء ديالك عارفيين انك مثلية ؟

لا طبعا الواليدين لا يعلمون شئ لأنها ستكون صدمة لهم والعواقب ستكون وخيمة و ربما يجريو عليا من الدار , وبالتالي غادي نفقد الناس لي عزاز عليا , و الأصدقاء نعم البعض منهم وعندهم عادي جدا ويحترمون ميولي وأغلبهم لادينيين .

  -واش عمرك حاولتي تعيشي بحال أي فتاة و تكبحي ميولااتك و تديري راسك انك فتاة كأي فتاة ؟

 طبعا فالأول فاش يالاه إكتشفت الأمر حاولت نوهم راسي بأني ربما مخطئة و ربما غير كايجيبليا وراه أنا ماشي مثلية غير كايسحابلي , حيت راه حتى شي واحد ماغادي يبغي يتزاد مثلي فبلاد كاتعتبر المثلية جريمة وكايعاقب عليها القانون !! و نحن ذنبنا الوحيد اننا ولدنا هكدا حيت كيفما هو متعارف عليه علميا الميول الجنسي يولد مع الإنسان ماشي يكتسب .

-شنو المشاكل لي كاتلقاي مع المجتمع ديالك و واش كاينين ناس كايتقبلوك كيما نتي . و ايضا واش كايننين ناس كايعايرووك او  كايهددوك ؟

بزاف ديال المشاكل بحال مثلا المجتمع فارض على البنت واحد السن معينة خاصها تزوج , وبطبيعة الحال المثلية مغاديش تزوج البنت لي كاتبغي بل غادي يكون بزز منها تزوج براجل باش ترضي المجتمع و ترضي واليديها و لكن بالمقابل راها كاظلم راسها اولا ثم كاظلم راجلها , و واخا تكون البنت مستقلة ماديا الهضرة ديال الزواج اتبقى ديما تابعاها , و من غير هادشي كلو كلنا عارفين أن المجتمع ديالنا كايعتابر المثلية شي حاجة حرام وحشومة وعيب وعار , بمجرد أنهم يعرفوك مثلي او مثلية غادي تكون حياتك جحيم , وأنا شخصيا ماكايضايقني حد ومكايهددني حد حيت خليت الميول ديالي لراسي و قليل من اللأصدقاء الأوبن مايند هما لي عارفين , والباقي كانلبس قناع الغيرية فاش كانكون معاهم باش مانجبدهمش عليا .

-لطيفة كشخص واش كايأثر فيها الرأي ديال الناس فيها ؟

الرأي ديال الناس زايد ناقص بالنسبة ليا , الناس خاصها تعلم تدخول سوق راسها

-لطيفة. واش كاتعتابري راسك مريضة ؟ نعم او لا

لا .

-بما انك جاوبتي ف السؤال السابق ب لا . بغينا أكثر تقولي لينا ماهي المثلية او اشناهو انسان مثلي

المثلية الجنسية هي إنجذاب أو ميول شعوري عاطفي أو جنسي طبيعي بين شخصين من نفس الجنس , في العلم والطب ماكايتعتابرش التوجه الجنسي اختيار ، وإنما تفاعلاً معقداً لعوامل بيولوجية وبيئية و أظهرت الأبحاث أن المثلية الجنسية هي إحدى التنوعات الطبيعية في الجنسانية الإنسانية و ماشي غير عند الإنسان بل لوحظت المثلية الجنسية عند أكثر من 1000 نوع من الكائنات الحية و حسب الإحصائيات فإن ذاخل كل مجتمع كاينة نسبة 1% المثليين , وخاصنا نفرقو مابين المثلية الجنسية و إضطراب الهوية  الجندرية.

-واش مقررة تكملي حياتك هكا وعلاش ؟

أنا هكا وغادي نكمل حياتي هكا , علاش حيت أنا هكا طبيعية مانقدرش نكذب على راسي و نبدل راسي باش نرضي الناس

-واش كايننين ناس مثليين في المغرب سواءا ذكور او فتيات؟

نعم كاينين مثليين و مثليات مغاربة وكانعرف البعض منهم .

-واش عممر كانت عندك علاقة بشي مثلية , وشنووو بلان الزوااج عندك ؟ و واش ماكاتفكريش ف الانجاب؟

نعم أنا فعلاقة حب مع فتاة مثلية حاليا أحبها وتبادلني نفس المشاعر , وبالنسبة للزواج وكما نعلم المثليين ماشي من حقهم يتزوجو فالمغرب , وأنا ماعندي مشكل الزواج ماشي مهم بالنسبة ليا المهم هو العلاقة تكون مبنية على الحب و الصدق , بالنسبة للإنجاب لا أبدا لي متأكدة منو هو أني عمرني أنولد التبني أه الإنجاب لا .

-واش المغرب بلد صالح لعيش المثليين بحرية ؟

طبعا لا لأن المجتمع المغربي ليس ناضج ولا يتقبل المثلية و لأن القانون يجرمها في الفصل 489 من القانون الجنائي المغربي، الذي ينص على عقوبة بالسجن تتراوح ما بين 6 أشهر و 3 سنوات لـ "كل من ارتكب فعلا من أفعال الشذوذ (المثلية ليست شذوذ) الجنسي مع شخص من جنسه".

-كلمة اخيرة تقوليها لكاع الناس لي كايقراو هاد المقال 

الحب ليس جريمة , قبل ماتحكم على شخص مثلي خاصك تعرف الظروف النفسية لي

كايمر منها أولا , و ثانيا خاصك تعرف شناهية المثلية و خاصك تبحث وتعرف فين 

تبحث حيت الحقيقة ماشي ديما كيفما كايقريها لينا المجتمع و المقررات المدرسية ,

الحب للجميع دمتم في سلام .

- من جهة اخرى خذييت اراء ديال نااس عاديين حول هاد الموضوع و هذا رأي الاخت خولة حول موضوع المثلية و اتوجه لها بالشكر من هذا المنبر.

واش تقدر تقبل شي حد ف العائلة يكون مثلي ؟-

 اييه نقدر نقبل بمثلي فعائلتي حيت ماشي دنبو و كنضن  كذلك بلي المثلية ماشي مرض و لا  حاجة معدية لغادي نخاف منه

واش تقبلي صاحبك ولا صاحبتك ايلا كان مثلي ؟ -

كيما قلت قبل بلي معنديش مشكل حيث كنرجح بلي يقدر يكون هاذ المثلي ضحية لظروف مثلا اغتصاب و لا تحرش و لا بغا يجرب حاجة جديدة و تمادى فيها ووقع فالخطا

واش كاتعرفي شي حد لي مثلي و كيفاش علاقتك معاه ؟ -

لا صراحة معنديش شي صداقة معا شي مثلي  و لكن لقاتني الحياة مع مثليين و كلن تصرف ديالي معاهم عادي كاي شخص

واش نتي ضد ولا مع تعنيف هاد الناس -

لا انا ضد تعنييف هذاك عمرو ماكان حل و اصلا تعنيف اسوء طريقة نقدرو نعالجو بها اي حاجة فحياتنا من غير المثلية

-ونتي كفتاة واش عمرك تعرضتي ل شي تحرش  من طرف مثلية ؟

اه تعرضت  لمحاولة تحرش من طرف مثلية

-علاش المجتمع ماكايتقبلش هاد الفكرة ؟

بما ان المجتمع ديالنا مجتهع عربي و مسلم ف من الطبيعي انه يرفض هاد الفكرة لانها معاكسة تماما لعاداتنا و تقاليدنا

-واش نتي مع ولا ضد المثلية باعتبارك انسان عادي ؟

فحنا فالاصل كنعرفو ان الانثى خلقت للذكر و كذا الذكر للانثى عكس المثلية .انا لست ضد و لا مع انا محايدة فهاد المسالة الحاجة لي نقدر نقولها انني كنحترم و نقدرخيار و  توجه اي شخص سواءا كان مثلي او ملحد.

و في النهاية أشكر لطيفة لانها قبلت ان تجيبني على كل الاسئلة و ان تفتح لنا قلبها . و اشكر الاخت خولة على وقتها . اتمنى ان أكون قد نجحت في تقريب حياة مثلية مغربية و اترك لكم الان باب التعبير و التعقيب .

بقلم ' مريم بنعلي '

خربشات مريم بنعلي