اساليب البقاء يامات الواليد '' الأغذية "

#أساليب_البقاء_يامات_الواليد

كلنا سمعنا من واليدينا ديك الكاسيطة ديال " شيبس كايدير لكونصير, موناضا كاندير لكونصير و الفرماج و اي حاجا كاتشرا ف الحانوت كاتدير السرطان " , و خلال سماعي لهاد المحاضرات ذات يوم مع الواليد و انا نسولو علاش هادشي كايدير الكونصير و هو يجاوبني " حيت فيهم مواد حافظة ابنتي " و طبعا ان سولت و عرفت علاش سولت و جاوبتو " المواد الحافظة كاينا تقريبا فجميع المواد الغذائية و كاتضمن لينااا الغذاء ديالنا يبقا صالح للاستهلاك ل مدة طويلة و على هاد القبل راه كووولشي مسرطن " .. وهنا طبعااا الواليد لقااا فسحة فاش يعبر عليااا و قالي ملي كان طفل ف السبعينيات " كانوو الناس ف منطقة الريف كايستعلمو طرق تقليدية باش يحافظو على الاكل و حتا الثلاجات ماكانوش عند الناس و عطاني نماذج كثيرة و غادي نذكر ليكم بعضها:

- بما ان الواليد كان ساكن قريب للبحر كان السمك من اكثر الحوايج المستهلكة تماا و كانو كايهزوه و كايفرغوه سواءا من الاحشاء او االعظام لي ف الداخل ديالو وكايشقوه من الوسط و كايملحووه مزيااان و كايحطو حووتة فوق من حوتة فواحد الوعاء كبيير حتا كايساليو الكمية لي عندهم و كايغطيوه و كايحطوه بعيد على الشمس و هاد الطريقة كاتخلي السمك يكون قابل للاستعمال لاشهر كثيرة .

- اللحم المقدد لي الغالبية ديالنا كايعرفوه و لي كايتم عن طريق اخد قطع صغيرة ديال اللحم و تعريضها للشمس لمدة طويلة باش تفقد السوائل لي فيها و ملي كاتنشف كانحطوها فشي بلاصة مافيهاش الرطوبة و كاتولي صالحة ل الاستعمال

- المطمورة و هي حفرة كانو كايحفروها الناس فالارض وكايخزنو فيها الحبوب بحال القمح و العدس و الشعير و هاد الحفرة كايتراوح العمق ديالها مابين مترين حتال ثلاث امتار , وكاتكون محاطة بالتبن و كاين لي كايخلط الطين مع التبن وكاتكون احسن

- الزيتون المدقوق لي كانو كايهزوه و كايدقوه مزيان و من بعد كايحطوه ف وعاء غارق و كايزيدو عليه الماء وكايخليوه مووودة حتا كاتمشي المروورة و كايهزو وعاء اخر كايديرو فيه الماء و الملح و كايبقا مودااااا و من بعد كانهزو الزيتون و نغطسوه فهاد الماء مع اضافة الحامض وكايبقا تما حتا كايولي على شكل مخلل وكايولي صالح للاستعمال وهادشي كايتدار ل الجزر و البصل وحتا الخيار

- التين المجفف و هنا كايهزوو الشريحة وكايحلووها و كايستفوهاا فوق من شي توب و وكايوضعوو عليها الزعتر فكل طبقة وكايعرضووها الشمس و فالليل كايغطيوهااا و هادشي لمدة اسبووع ومن بعد كايولي التين صالح للاستعمال وكايبقا لمدة طويلة.

- اما احدث الطرق للاحتفاظ بالطعام لمدة اطول هي البيصارة لي كايطيبووو كمية كبيرة منهاا و كايكبوها في اناء وكاتدخل للثلاجة و فوقتما بغيتي تطيبها كاتهز ملعقة او القد لي بغيتي وكاتكبو ف الطنجرة و كاتزيد ليه الماء و تطيبها و ديك البيصارة لي فالثلاجة كاتبقا حتال سيمانا و زيادة صالحة للاستعمال . 

 و تحية للناااس لي كانو قبل منا وعرفو كيفاش يسيرو راسهم فدوك الظروف .

#خربشات_مريم_بنعلي

#خربشات_مريم_بنعلي

أكمل القراءة

السعادة الافلاطونية

السعادة هي ملي كاتنعس شبعاان وكرشك فرحانا ،  السعادة هي ملي  كاتفيق كاتلقا الثلاجة عامرااا و القفة كاتوصلك حتال باب دار فيها كاع داكشي لي تحتاح ، السعادة هيا ملي كاتطل على جيبك كاتلقا واحد ششعا زرق كايضرب و وريحة زرقالاف عاااطياااا -وما ازكاها رائحة - السعادة هيا ملي كاتكون خدام فداكشي لي كاتبغي وكاتمشي للخدمة بحال ايلا غادي تلاقا مع الساطة ديالك و كاتكون مفركس ، زاز لوز و طبعا راه السعادة هي انك تشري كاع لحطة ولباسي لي كايعجبووك و ترييح ليييك ب الباخفان لي ساوي زرقالاف لفوف ماشي الما و لوسيور لي كايتباع فالسويقة ، السعادة هيا تكون كاتقرا داكشي لي كاتبغي و فنفس الوقت تكون ديما خاااارج ،ناشط معا صحابك فكاع البلايص زوييينين و تحس براسك موووهيم و تفاليدي سوووميستر و يزيد ليك باااك فالمصروف 😎 ، السعادة هي تكون بصحيييحتك و ماعندك حتا مشكل لي غادي ينكس ليك حياتك ، السعادة هيااا تكون متصااالح معا ذاتك و كاتبغي راسك و كاتبغي الناس لي دايرين بيك واخا يكونو ماحاملينكش ، واخا يكونو آذاوك بشي حاااجااا ، المهم هو انك تكون مرتااح نفسياا حيت عارف راسك اش كاتسوا ، السعادة هيا تجلس مع صحاب كلهم مختاالفييين من كل الجهاات و تضحك معاهم وتنشط معاهم حيت حتا حاجا ماكاتستاهل دابزو عليها حيت كلكم ( انسان ) ، السعااادة هيا ملي كاتعرف قيمة الحياة و كاااتحاول تستافد منها بأي طرييقة و فالتالي كاع داكشي لي كايضيرونجيك كاتإليمينيه ، السعادة هي  ملي كاتكون واكل جوانط على شي حد لموووودة طويلة و كايجي يعتارف ليك بالاهتمام  ديالو بيك ، السعادة هيا ملي كاتكون ف علاقة مع شي حد و كاتعتابرو بحال راسك و كاتكون نتا هو نتا قدامو بدون تصنع و كاااتعييييشو الحياة بتجلياتهااا بلا بروتوكولات و الضغوطات ديال المجتمع  و فوقتما حتاجيتيه تلقاه فأي وقت، السعادة هيا ملي كايوقرك بنادم ملي  كاتبغي تبقا بوحدك بلا شرييك و عايش حر ديال راسك حيت نتا وراسك كاتشكلو فديك اللحظة احسن كوبل ، السعادة هيا تشم ريحة كتاب غابر و تكاغيسيه بين يديك بحال شي طفل صغير مدلل او ملي كاتكون فشي لحظة انعزالية و كاطلق احسن بلاي ليست ديال الموسيقى عندك فالتيليفون و كاتستمتع باللحظة ، السعادة هيا تشطح ، تغوت ، تحيح ، تغنيي ، بوحدك ولا معا شي حد بلا مايحي يحاسبك شي حد و يتاهمك بالجنون ، السعادة هياا ملي كاتكون مفاهم معا داركم و قبل لاتنطق كايعرفو شنو كايدور فبالك و كايعتابروك انسان بعقلو و كايديو على هضرتك و كايديرو بشوارك وكايمشيو معاك فالخط و يعاونوك باش تحقق احلامك و كايساندوك ف كل لحظة فحياتك وفوقتما حتاجيتيهم تلقاهم و تكون نتا وياهم عندكم نفس العقلية  ، السعادة هيا تسااافر و تمشي لكاع المدون و الدول لي حاط ف باااالك و تلاقا بناس جداد و تصور 70 الف تصويرة في كل مكاااان  او تنعس ف وسط شي غابة او جمل وتأمل المناظر الخلابة ، السعادة ملي كاتمشي لشي بلاصة بعيدة على المدينة و كاطلع عينيك للسماااء و كاتشوف الجمالية ديال النجوووم و كاتحس بعظمة الكون فاش عايشيين. .  .
السعادة هيا بززااااف ولكن ماصعيباش باش تحقق  ، كل واحد يقلب على السبيل د السعادة ديالووو اينما كانت ..دمتم سعداء .
#خربشات_مريم_بنعلي

أكمل القراءة

واش الهواء عندو وزن ؟

بزاف ديال الناس كايمشيو غالطيين حيت كايعتاقدو ان الهواء عبارة عن فرااغ وماعندوش وزن خصوصا ف القرون الماضية ولكن مع تطور العلوم كولشي وللا واضح وفالتالي اليوم غادي نتعرفو على اشناهوا الهواء و كيفاش عرفنا ان له وزن ؟

- الهواء يا اصدقائي مكون من مجموعة من الغازات بحال الازوت و الاكسجيين و ثنائي اكسيد الكربون و الارغون الخ , و هاد الغازات هي لي كاتكون لينا المجال الجوي للارض و هي لي كاتحمينا من الاشعة الفوق بنفسجية الخطيرة على الانسان و باش نحدد بالضبط ف غاز الاوزون هو سووبر مان ديالنا و لي كايتواجد ف طبقىة الستراتوسفير و كون ماشي هو و كون الحياة انعدمت فالكرة الارضية نتيجة الاشعاعات الخارجية المنبثقة من الشمس و هادشي من بين الاسباب لي كاتخلي الحياة ممكنة على وجه الارض, وفالتالي ايلا مشا الاوزون هزنا الماء .

اما مسألة وزن الهواء فكما قلت سابقا من ديما الناس دايرين ف بالهم ان الهواء لا وزن له حتال القرن 17 مع العالم تورشيلي لي دار تجربة كايثبث فيها ان للهواء ثقل و هاد الثقل كايطبق ضغط على الجو والتجربة كالتالي : هز صاحبنا انبوب زجاجي طويل و عمرووو بالزئبق و سد عليه و قلبو على اناء اخر فيه الزئبق وحل الفتحة باش يتكب فانخفظت قيمة الزئبق ف الانبوب وبقات واحد البلاصة كايبان ليها ان مافيها والو ولكن راه كاينا شي حاجاا تما ف الانبوب كاتطبق ضغط على الزئبق و ماكاتخليهش يخرج كامل وهاد الحاجة هي وزن الهواء و للاشارة هاد الميكانيزم باش تدارت التجربة كايتسما جهاز توريشلي و هاد السيد هو لي ختارع البارومتر أو مقياس الضغط الجوي . و كاينين مجموعة من التجارب الاخرين لي نقدرو نتأكدو بيهم ان للهواء وزن فمثلا نهزو قرعة و نفرغوها من الهواء عن طريق الشفط ونسدوها و نوزنوها و من بعد نحلو القرعا و نستناو شويا و نعاودو نزونوها ف غادي نلقاو ان الوزن تزاااد و دااكشي لي تزاد مابين العمليتين هو الوزن الصافي ديال الهواء و لي ماكايخليناش نحسو بالوزن ديال الهواء حيت الضغط الخارجي ديال الهواء كايتوازن مع ضغط الجسم الداخلي ديال الانسان وفالتالي كايكون واحد ليكيليبر لي كايخلينا عايشيين بيييس , ولكن الناس لي كايطلعو شويا المرتفعااات راه كايحسو بالمرض ماشي غي حيت الاكسجين كاينقص و انما حتا ضغط الجو كايتغير و فالتالي ماكايبقاش التوازن و تما الانسان كايستشعر النعمة لي كان عايش فيها قبل و فالتالي وجب الاحتياط عند الصعود للمرتفعات .

أكمل القراءة

علاش INOX ماكايتصداش

كلنا غادي نكونو شربنا ف كاس ديال اينوكس ، ولا طيبنا ماطيشة و البيض فمقيلة ديال اينوكس ، او استعملنا شي جهاز مصنوع منوو ، ولكن شنو هو هاد الاينوكس علميا  ولاش كايصلاح ؟ 
 - كانعرفو كاملين ان الحديد كايتصداا ، وكايرشا مع الوقت خصوصا ايلا تعرض للماء و مجموعة من العوامل الخارجية وفالتالي فكرة اننا نختاروه كمادة نصاوبو بيها الاواني المنزلية ديالنا او المنشئات كيما بغات تكون فكرة سيئة حيت غادي يتصدا مع الوقت و هنا جاااات فكرة تصنيع الاينوكس لي خاصك تعرف ان  الاسم ديالو  هو اختصار ل   l'acier  inoxydable  ولي كايعني بالعربية " الفلاذ المقاوم للصدأ  "  و لي كايتكون من 50 ف المية ديال الحديد تقريبا ، غي هو كانزيدو ليه بعض العناصر الاخرى كالنيكل ،  والنيوبيوم ،  والتيتانيوم ،  والكروم بنسب مختلفة ، ولكن كلما كانت نسبة الكروم عالية كلمااا الفولاذ ديالنا كايكون مقاوم للصدأ حيت الطبقة الخارجية الرقيقة ديال الكروم هي لي كاتحميه و كاتخليه مايتآكلش و السر في ذلك هو ان الكروم ملي كايتفاعل مع الاكسجين الخارجي كايكونها لينا ،  وفكل مرة كايتقاس المعدن ديالنا بالمااا او كايتخدش  كايوقعو تفاعلات لي كاتخلي ديك الطبقة تتجدد ذاتيااا ، ولكن مع ذلك تحت بعض الظروف المحددة  يمكن يتصدا الاينوكس ديالنا ، و يستحسن ان الانسان يتأكد مزيان من النوعية ديالو قبل لايشريه ، وذلك بالتأكد من نسب العناصر لي كاتكون مخلطة مع الحديد فثلا الكروم ماخاصش ينزل على 12 فالمية ايلا بغينا شي حاجا ناضية  . و من هاد المنبر خاص نشكرو هاري بريسلي لي كان اول شخص ف سنة 1912 يكتاشف بالصدفة هاد السبيكة  المقاومة للصدأ ، و العييلم دائما في خدمة الانسااان باش تكون حياتنا احسن و اسهل . 
#خربشات_مريم_بنعلي 

أكمل القراءة