السكايري كيوت

السكاايري كيوت هو داك بنادم لي غادي يطللع ليك لمورال واخا يكون طالع ليك الدم و ملي كانهضر على السكايري كانقصد داك النوع لي كايهلل و كايغني العلوة و كايفيق الدرب كاامل و هو كايتلاح من حيط لحيط حتا كايوصل لعتبة ديال الدار ، كاايدخل بصعوبة الساروت ف الباب و ملي كايحلوو كااتستقبلو المادام و كاتقول ليه دخل ا داك لمزغوب شوهتينا ، و هاد النوع د سكايريا غالبا كاتشدهم الحالة على نجاة عتابو و الشيخة تسونامي و كايقول ل مراتو تحزم و تبدا تشطح ليه و هو كايتلاح عليها و كايدوزو الليلة شطيح و رديح حتى مطلع الفجر ، و السكايري قبل لايدخل للدار كايكون دايز من شحال من بلاصة و داوي مع بزاف ديال الناس حيت كايولي كائن اجتماعي بامتياز ، و قادر على ربط علاقات بكل سهولة حيت الشراب كايزعم بنادم و شكون فينا لهي ماتلاقاش ب سكايري كيوت و ماطلعهاش عليه ياما ف طوبيس ياما ف الدرب ياما شي طالب ولا تلميذ سخن عليه راسو و سكر و جا للمدرسة ولا شي صاحبك او حتى شي حد من فاميلتك ، و غالبا ملي كاتدوي معاه كاتلقاه كايفهم ف السياسة والرياضة و الفن و حتا الدين ، دابا تصور معايا سكايري كايدير الفتوى فالدين ، باش تعرف ديلموو كاع الفيزيبلات لي ف دماغوو تسوطاو ، و كايخصك غير تجبدو و كايطلق شي افكااار فشكاااال ، و السلوكية عند صديقنا السكايري لعلك ترضى كاتبقاا غي تسمع و تشووف و تفرنس حيت حتا الضحكة ماتقدش تضحك حيت بمجرد توسع فمك غادي يبدا عليك علاش كاتضحك نتااا و يا ويلك ايلا شي سكايري شد فالهضرا كايبقااااا يعاودهااا حتا كاتولي تطلب غي التعادول ، و غي مؤخرا تلاقيت انا و شي اصدقاء ف الطوبيس مع سكايري كيوت ، كان جالس قدامنااا و سمعنا كانهضرو على موضوع و هو يتدخل و بدا كايعطينا رأيو و ملي ضحكت قاليا بصوت مثثقل " نتييييي علاش كاتضحكي جاتك الهضرا لي قلت فشكاال " و المهم دغيا تلفوه دراري عليا و صدق شاد معاهم جماعة وبدا كايسلوكي علينا و واحد اللحظة بدا كايبوس راااس الدراري حيت لقاهم عارفين المنطقة لي كاينحادر منها ( الصويرة ) و ريحتو كاتضرب بالشراب و فديك اللحظة كانقول ويلي ياكما غادي يبوس ليا حتا انا راسي و جاب الله مادارهاش و المهم شدينا معاه الجماعة غي هو كاايطلق السخون و حنا كانطلقوو الباارد و كاع لي كان جالس حداناا تفرشخ بالضحك حيت كايقول شي هضرا فغيموون بزااف و الواعرا كايدور عند الصديق لي جالس حدايا و كايقوليه بالجهد " نتاااااا هو عبد الحليم حافظ ، شوف شوف الملاميح والله حتا عبد الحليم حافظ " ههههه و صديقي لصقنا ليه داك اللقب صحاااا و لكن للاسف ماشي كاع سكايريا كايكونوو كيوت حيت كاينين دوك لي كايبداو يهرسوو و يضربوو و يعنفووو و هادو غالبا دوك لي كايسكرو باش ينساو الهموم حيت فرق كبير بين لي كايسكر باش يزها و لي كايسكر باش يبررد على راسووو و كاين واحد نوع لي ماكايشدش فيه الشراب ، غي كايدير راسو سكران و مشروااط باش يضحك عليه بنادم و يدير فيها كوميديان ولا باش يوصل ليك الهضرا لي ماكايقدش يوصلها ليك و هو ساحي و حتا ايلا قال شي عيب كانقولو هانيا راه غير سكران و هاد نووع غاالبا كايكون شرب بزاف حتاااا ولا عندو الشراب بحال كاس د الماء ...
#خربشات_مريم_بنعلي