اليوم غادي نتعرفو على واحد المجرمة لي قتلات بزاف ديال الناس و بسبابها تشردو عائلات و لكن ماكاين لي يحاسبها ، اسم هاد المجرمة : شجرة "المنشينيل" و معروفة ايضا باسم شجرة الموت و الجوافة السامة ، ايه هاد الشجرة كاتعتبر اخطر شجرة في العالم حسب تصنيف غينس ، ايلا قستيها غاتسبب ليك ف تقرحات و التهابات خطيرة ، و ايلا كانت الشتاء و فكرتي انك تدي ل الحبيبة ديالك لشي غابة ، باش تبدلو الجو -طبعا-و جلستو تحت هاد الشجرة و طاحو عليكم قطرات المطر لي كايقطرو منها فراك شريتيها فالكحل و البيض حيث النسغ لي كاين فالشجرة يحتوي على مُركب phorbol، لي كايسبب تقرحات في الجسم وكمية قليلة من مُركب phorbol تقدر تحيد بيها الصباغة ديال الطوموبيلات ، وفالتالي غاتكونو تصورتو خطورة الوضع ، هاد الشجرة القاتلة متواجدة بكل انحاء فلوريدا و امريكا الوسطى و الكارايبي و ينصح انك تعطيها 9 متر ديال تيساع ، و قديما كانو الكارايبيين كايستخدمو العصارة ديالها السامة ضد الاعداء ديالهم بحيث كايهزو العصارة و كايديروها على رؤوس الاسهم و كايشيرو على لبشري .. و نتا ككائن شمال افريقي يقدر تكون مسركل شي نهار ف ميريكان و تدوز من حدا هاد الشجرة غادي يسحاب ليك بانها شجرة التفاح و طبعا غادي تبغي تذووق تفاح ميريكان كيداير و فالتالي غادي يخرجو ليك فقاعات في الفم و غايتنفخ ليك الحلق و يتورم و تشدك كرشك حيت كايسبب مشاكل في الجهاز الهظمي و ايلا ماتلقيتيش الاسعافات فالوقت المناسب غادي تودع ميريكان والعالم ، و للاشارة ثمارها اقل سماا من النسغ ديالهاااا حيت النسغ دقة ب بطلة .. و اكثر من هادشي ايلا تحرق الخشب ديالها و كنتي على مقربة من الدخان ف ف غادي تشدك الكحة، والتهاب الحنجرة، والتهاب الشُعب الهوائية، و اكفس حاجا هيا انك تقدر تعمى ، المهم هاني وصيتكم ..
0 التعليقات:
إرسال تعليق