موسيقى الروك تاريخيا

الروك يا اعزائي بان ف خمسينيات القرن الماضي ، ديك الفترة يالاه خرج العالم من الحرب العالمية ،  وبنادم باقي دمو سخوووون و فيه شي شعلة خاص يفرغها بطريقة ايجابية حيت الحرب دمرات النفسية ديال بنادم  ، و خاصك تعرف انه قبل من روك كانت الموسيقى الهادئة لي منتاشرة ، و اكثر حاجا كان كايتمزك ليها بنادم هياا الكانتري فالربعينات ، وراه بشكل اخر  لي ساهم في ازدياد المولود الثاائر ديالنا هو التلاقح بين البلوز والكانتري والفولك. وهذا التداخل طلق عليه آلان فريد  و لاول مرة اسم " الروك اند رول " ، في عام 1951. و كاين لي مشا بعيد و اعتبر الروك حركة فكرية حيت الكلمات ديال دياسك ماكانوش بساااط و انما فيهم العومق ديال العومق و كانوا كايهضرو على الثورة ، الغضب ،الاكتئاب ،  الحرية و التحرر ،التمرد في كل شيء..الخ داكشي علاش تعتابرات حركة ثقافية و اجتماعية ماشي غي فنية ! ،و حتا من الموسيقى ماكانتش اعتيادية و اعتدمت على ثلاث آلات رئيسية، وهي: الغيتار ايليكتريك ، البيس غيتار، الدرامز..و سرعان ما انتشر هاد النوع الموسيقي الجديد ف اميريكا و بريطانيا بطريقة غير مصدقة ، روك وللا عندهم نمط حياة ، و المراهقيين لي كانو تحت سن 18 بقاو كايتمزكو ل روك حتال شرفو و داكشي علاش ف السبعينات وللا عندنا مجتمع كامل كايتمزك ل روك من صغير ل الشايب .. و كايتعتبر بيل هالي من المغنيين الاوليين لي رسخو ثقافة الروك و قدر يحرز نجاااح باهر و باع ملايييين النسخ من دياسك ديالووو ف ميريكان ، اما ايلا مشينا ل بريطانيا غادي نلقلو لبيتلز لي نوضو خبلا تما ، حيت بريطانيا فداك الوقت كانت ملتزمة و محافظة و بنادم كايتمزك لداكشي خفيف ظريف و فبعض الديسكوات كانو كايطلقو ليهم دياسك د روك كايشطحو بيهم شويااا و يجمعو لوقفا  ، و في ليفربول بالضبط كان الاقتصاد عيان و بنادم كافر على الوضعية و كان كايلتاجأ ل رووك المستورد من امريكا  باش يبرد الغدااايد و فنفس الوقت لقاوها الشباب النقطة التي افاضت الكأس ديال التقاليد البريطانية لي كانت رجعية بالنسبة للشباب د داك الوقت و كانو كايشوفوها تفق في طريق التنمية ( حنا باقي ماوصلنا لهاد المرحلة لي وصلو ليها هوما فالستينات ) و هادشي كامل ساهم فالثورة و دراري بداو يثورو موسيقيا و شراو غيتارز و درامز و اسسوا فرااقي ولكن البيتلز هي الفرقة لي قدرات توصل و دير بوم ف بريطانيا و امريكا و العااااالم و اول ظهور ديالهم ف التلفزة الامريكية حصد على نسب قياسية من المشاهدااات و فديك الفترة تعرفاات كذلك فرق أبرزها :ا أنيمالز، بي جيز  ذي هوليز...و الكثير ! و عموما اكثر الاسماء لي تشهرات تاريخيا و تركت بصمة فالروك : الفيس بريسلي ..ايرسميث..كوين..بيتلز..جانز اند روزز ..ذا رولينغ ستونز..جومي كاش..ذا هو..ليد زبلن..بينك فلويد ..فان هالن ..ليون راصل..جيمي هاندريكس ..
 الروك كان مرفوض من بزاف ديال الجهات حيت كايداعيو انه يفسد اخلاق الشباب و يدعوهم للجنس و الفساد و السرقة و النهب الخ و موضوع الروك اند رول ماغايوقفش هنا حيت طراو بزاف ديال الحيثيات السياسية لي كاتعلق بالصراعات ديال البيض مع السود ف ميريكان و الروك كان داخل فهادشي و الاذاعات والميديا عامة لعبو دور فالمسرحية لي كانت واقعا و يمكن نكمل المقال فيما بعد حيت كاينا بزاف د لهضرا هنا...خلاصة القول الروك ماشي موسيقى فقط ،الروك نمط عيش بالنسبة للكثير ...

#خربشات_مريم_بنعلي