مسلسل غلي

اليوم غادي نهضر ليكم على واحد المسلسل امريكي معروف عند الشباب و عندو شعبية كبيرة ف بلاد العم سام سميتو " غلي " , هاد المسلسل بدا الاصدار ديالو ف 2009 ف قناة فوكس و فيه خمس مواسم و اخر موسم كان العام لي فات , و انا شخصيا كانعتابروو واحد من المسلسلات لي قدرو يدوزو بزاف د الميساج من التحت للشعب الامريكي و ل العالم و هادي حاجة لي تقدر تكون ايجابية و كاين لي غادي تبان ليه سلبية خصوصا اصحاب المؤامرة وداكشي ..علاش و كيفاش ؟؟ انا جاياكم ف الهضرا .

 ايلا كنتي من عشاق الدراما و الموسيقى ف هاد سيري احسن حاجة تقدر تفرج فيها حيت كاتهضر على واحد النادي لي سميتو " غلي " لي كايجمع بزاف ديال الشباب لي اغلبية ديالهم من الكوانب و الدمادم د لليسي و كايعيطو عليهم " لوزرز " اي الفشلة ,دوك لي محكورين ف المجتمع و ماعندهمش متنفس فين يقضيو وقتهم فمكايلقاو الا الموسيقى كاتعالج المشاكل الاجتماعية ديالهم و هوما بداو كنادي بسيط كايشاركو ف المسابقاات الاقليمية شويا الوطنية و شخصيا بزاف ديال دياسك ماكانتسنطش للمغني الاصلي كاندوز ديريكت للفيرسيون ديال "غلي" حيت صراحة كايصرعووو الغناء بجميع انواعه و ف كل حلقة كايكون ثييم معين و لا مغني معين لي كابداو يتغناو دياسك ديالوو ..و مثلا ايلا طرا شي حدث معين و كاين شي ديسك كايهضر على نفس الحدث لي وقع ف سيري ف كايتغنى كذلك و ماعليكم غير تكتبو " غلي " بالانجليزية ف يوتوب و يخرجو ليكم دياسك ديالهم الا مافيكم لي يتفرج ف سيري, الغريب ف غلي هو انهم ماجاوش و حطو الشخصيات غير هكاك تعمدووو يحطو شخصيات محددة طيلة السنوات ديال العرض , ف الموسم الاول كان هناك احتشام بعض الشيء حطو شخص مقعد و واحد البنت مثلية و واحد دري مثلي وشي لعيبات بحال هكا و الشخصيات العادية لي كانوا بطال حتا هوما كانت عندهم مشاكل و لكن من نوع اخر , و انا اول مرة تعرفت على شي حاجة سميتها المثلية ف كانت عن طريق هاد المسلسل و كانت الصدمة عليا قوية و لكن مع لوقت كاتبدا تقبل بزاف د المسائل و عن قناعة, المسلسل كايخليك تعرف الحياة ديال مجموعة من الاشخاص و تقرب منهم اكثر . و كايوريك المشاكل لي كايعيشوها ف المجتمع و مع الاجزاء المتتالية كل مرة كايتزادو شخصيات جداد و قضايا جداد لي كاضرب العمق واخا المسلسل كايبان ليك فيه غير الموسيقى و النشاط و الضحك و لكن الميساج قوي و تقريبا بحال ايلا كان كايعالج التطور ديال المجتمع الامريكي من 2009 حتال 2015 و كاين فرق كبير بين الاجزاء و انا متأكدة بلي ايلا المجتمع الامريكي اليوم قدر يتأقلم مع بزاف ديال الظواهر ف بفضل هاد المسلات حيت كاتولي عندك ديك القضية ديال التقبل مع الوقت و مهما اختلفنا ف المودة تجمعنا و بزاااااف د القيم الانسانية لي تقدر تكتسب . المهم ننرجعو ل سيري ..السيري كانت غادا مزيان حطا طرا واحد المشكل البطل مااات ف الواقع " كوري مانثيتث " مازال كانعقل ف واحد رمضاان كنت شادا برنامج" اي تي " و انا نسمع الخبر بلليل وبقاا فيا الحال, كان ممثل و مغني بارع جداا و الرحيل ديالوو أثر ف المسلسل ف جميع الممثلين و خصوصا البطلة لي كانت خطيبتو ف الواقع و فالمسلسل و كان داك الاسبوع غادي تصور الحلقة ديال الزواج ديالهم و للاسف ماااات و اضطروا يقتلوه ف المسلسل كذلك و غادي نخلي ليكم رابط واحد ديسك غناتو البطلة عليه ف المسلسل و المشهد راه واقعي و البكاء ماكانش اصطناعي و صراحة سيين مؤثرة بزاف.. و المهم سيري استمرت وحصدت نجاح كبير ف كل الاجزاء و للاشارة ف المخرج هو " ايريك ستوتلز " و المؤلفان هما " يان برينان " و رايان مورفي " .. ماعرفتش واش كاين جزء سادس ولا لا ولكن لي نقدر نقولكم . تابعوا هاد المسلسل حيت ممتع بزاف و كلوو غناء رائع و غادي تفهمو منوو بزاف و غادي تاخدوو منوو بزاف د الانسانية عن اقتناع . و سطرو مزيان على ديك اقتناع .
 :رابط الاغنية
https://www.youtube.com/watch?v=ToiDKxSOm0A